［第十二餐］［台北美食日常］好記擔仔麵。
1. 今日食少啲，講真的。呢間亦都係有啲名氣，仲有唔少遊客去。我睇舊文見有塊招牌，寫住從不漲價，廿幾年嚟免費續湯續肉燥。不過係2014年嘅文，當時賣35。而家40，唔知係外賣貴啲定真係加咗價。然後你諗真啲，廿幾年都唔加價都幾大鑊。
2. 咁，擔仔麵，台南嘢，應該不用多講，最出名當然係度小月。出唔到海嘅日子就係小月，最初條友出唔到海就賣擔仔麵，是為度小月。台南本店相當好食，其他分店就差啲了，海外馬交香港更加唔使食。
3. 另外，台灣同日本有啲相似，日本固然「傳統上」食米，因為除咗北海道以外根本唔適合種小麥。你見嘅拉麵十分流行都係戰後嘅事，戰前就只係中華街玩意。戰後一來好多士兵由中國返嚟，二來仲有美國質麵粉畀日本，先開始咁多麵。日清都係60年左右咋。你以為嘅「傳統」未必真係好耐。（然後可以講明治之前唔食肉添）（另外韓國菜傳統唔食羊都係差不多原因，日本亦好遲先有羊，後者睇村上春樹咪知，前者，同韓妹傾計就會知，你有冇見韓國菜有羊？）
4. 咁台灣一樣，本省人「傳統上」係唔食多麵的，亦係食米。因為唔啱做小麥。當然更加都唔多食牛，一來冇錢，二來牛好神聖（又貴），唔係拎嚟食。所以大家都知「台灣牛肉麵」係外省人嘢。當然文化係一路變的。
5. 亦因為類似原因，你見擔仔麵by default 就當係點心小食，即使台灣人比香港人細食，都唔係當正餐。所以必然係細碗。
6. 咁拎嚟做正餐，本人一個肯定太少，兩個差不多。味道不錯。（雷頌德老婆mode）「不過好似有啲鹼水味」「可能冇過冷河」
7. 不過好重要，湯當然係另上（我發現呢個已經係常識，有幾次我唔記得寫佢地都會照做），十分滾熱辣。
8. 另外，紅燒肉出名，可惜我叫時已賣晒。咁另外見到有透抽（魷魚啲friend），十分正。仲有一個雞捲，唔係因航嗰啲，亦係台南嘢，不過呢間就麻麻地
9. 整體覺得普通，不過試下唔同嘢。照計堂食好食啲，仲可以好似大牌檔咁門口揀餸，有機會食下。
10. 兩個麵80，雞卷175，透抽130。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
月頭訂最抵，Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已800人訂！（https://bityl.co/4Y0h）
Search